សម្តេចតេជោ ហ៊ុន សែន ប្រធានគណបក្សប្រជាជនកម្ពុជា នឹងមានជំនួបពិសារអាហារសាមគ្គីជាមួយសម្ព័ន្ធគណ បក្សនយោបាយទាំង២៧ នាថ្ងៃទី២៧ ខែមីនា ខាងមុខនេះ នេះបើតាមលោក ហួន ច័ន្ទថុន ប្រធានកណបក្សខ្មែរ អភិវឌ្ឍន៍សេដ្ឋកិច្ច ក្នុងនាមជាសមាជិកសម្ព័ន្ធគណបក្សនយោបាយ បានបញ្ជាក់នៅថ្ងៃទី២០ ខែមីនា ឆ្នាំ ២០២៥ នេះ ។

លោក ហួន ច័ន្ទថុន បានឲ្យដឹងនៅក្នុងជំនួបជាលក្ខណៈអាហារសាមគ្គី ជាមួយសម្ព័ន្ធមិត្ត នៃគណបក្សទាំង២៧នេះ ក្នុងគោលបំណងរឹតចំណងមិត្តភាព និងបង្កើន នូវភាពស្និតស្នាលជាមួយគ្នាបន្ថែមទៀត ក៏ដូចជាបង្ហាញនូវ មនោសញ្ចេតនា និងឆន្ទៈសម្រាប់ស្មារតីរួមគ្នា ក្នុងការបម្រើផលប្រយោជន៍ប្រជាជន និងសង្គមជាតិ ផងដែរ ។

ជំនួបនិងការពិសារអាហារសាមគ្គី នាពេលថ្ងៃត្រង់ ក្រោមវត្តមានសម្តេចអគ្គមហាសេនាបតីតេជោ ជាមួយនឹងតំណាងគណបក្សសម្ព័ន្ធទាំង២៧ ពិធីនេះធ្វើឡើងនៅវិមាន៧មករា ដោយមានគណបក្សប្រជាជនកម្ពុជា និងគណបក្ស២៧ទៀត ដែលបានចុះកិច្ចព្រមព្រៀងចងសម្ព័ន្ធជាមួយគ្នាកន្លងមក ។

គួរបញ្ជាក់ថា គណបក្សប្រជាជនកម្ពុជា និងគណបក្សទាំង២៧ផ្សេងទៀត បានចុះហត្ថលេខាចងជាសម្ព័ន្ធជាមួយគ្នា កាលពីថ្ងៃទី២៥ ខែតុលា ឆ្នាំ២០២៣ ជាក់ស្តែងខណៈពេលនោះក្រោយបញ្ចប់ការចុះហត្ថលេខា នៃការចង សម្ព័ន្ធមេត្រីជាមួយគ្នាហើយនោះ សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ថា គណ បក្សនយោបាយទាំង២៧ គឺក្លាយជាដៃគូរស្មើភាពនិងស្មើសិទ្ធិជាមួយគ្នា ពោលគឺគណបក្សទាំង២៧ មិនចំណុះឲ្យគណបក្សប្រជាជនកម្ពុជានោះឡើយ ដោយឈរលើគោលជំហរស្មារតី រួមគ្នាថែរក្សាការពារសន្តិភាពឲ្យបានគង់វង់ ដើម្បីជាប្រយោជន៍ប្រជាជនខ្មែរ និងប្រទេសជាតិ ៕