ឯកឧត្តមបណ្ឌិត ហែម ប្រសើរ បាននិយាយថា រូបខ្ញុំពិតជាមានសេចក្តីសោមនស្សនិងរំភើបយ៉ាងក្រៃលែង នៅពេលឃើញថា ក្រសួងទេសចរតែងតែយកចិត្តទុកដាក់នៅក្នុងកម្មវិធីដ៏សែនសប្បាយរីករាយ ក្នុងឧិកាស ពិធីចាប់ត្រីបែបបូរាណប្រចាំឆ្នាំ ដោយឡែកតែឆ្នាំនេះ គឺឃើញថា សប្បាយរីករាយជាងឆ្នាំមុនផងដែរ ។

ពិធីចុះចាប់ត្រីតាមបែបបុរាណ គឺមានអ្នកចូលរួមរាប់ម៉ឺននាក់ក្នុងបឹងត្រពាំងក្រម នៅស្រុកមេមត់ ខេត្ត ត្បូងឃ្មុំ ដែលបានធ្វើឡើងក្នុងខែកុម្ភៈនេះ ។ បឹងត្រពាំងក្រម គឺស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ មានផ្ទៃជម្រាលប្រមូលទឹក៣០ហិកតា និងមានបឹងតូចៗ២០បឹង ជាសាខា ព្រមទាំងមានរុក្ខ ជាតិលិចទឹកជាច្រើនប្រភេទ ហើយរៀងរាល់ដើមឆ្នាំក្នុងអំឡុងខែកុម្ភៈ ប្រជាពលរដ្ឋនៅទីនេះ តែងតែប្រារព្ធ ពិធីចាប់ត្រី យកមកចំអិនហូបជុំគ្នា ដែលជាទំនៀមទំលាប់ តាំងពីដើមរហូតមកដល់សព្វថ្ងៃ ។

ឯកឧត្តមបណ្ឌិតបានបញ្ជាក់ថា ការជួបជុំគ្នានិងប្រារពពិធីដ៏សែនសប្បាយរីករាយប្រចាំឆ្នាំនេះ គឺបាន ដំណើរការឡើងក៏ព្រោះតែប្រទេសយើងមានសុខសន្តិភាព មិនមានជំនោកល់យុគ្គ មិនមានភ្លើងសង្គ្រាម ដែលធ្វើឲ្យយើងទាំងអស់គ្នាបានរួមរស់នៅជួបជុំប្តីប្រពន្ធកូនពោពេញដោយស្នាមញញឹម ដូច្នេះយើងទាំង អស់គ្នា ត្រូវរួមគ្នាថែរក្សាការពារម្លប់សន្តិភាពនេះ ឲ្យមានប្រសិទ្ធិនិងបានគង់វង់ជារៀងរហូតទៅ ដើម្បី ក្រុមគ្រួសារយើង កូនយើង ចៅយើង រស់នៅពោពេញដោយមោទនភាព និងសុភមង្គល ក្នុងនាមជាមនុស្ស ជាតិរស់ក្នុងសកលលោក ៕