តាមរយៈផេកផ្លូវការរបស់ធនាគារអភិវឌ្ឍន៍ជនបទ និងកសិកម្ម ហៅកាត់ថា (ARDB) បានបង្ហោះកាលពីព្រឹកថ្ងៃ
សៅរិ៍ ទី០៨ ខែវិច្ឆិកា ឆ្នាំ២០២៥ នេះថា រដ្ឋាភិបាលបញ្ចេញថវិកា តាមរយៈធនាគារអភិវឌ្ឍន៍ជនបទ និងកសិកម្ម ចំនួន៤០លានដុល្លារបន្ថែម ដើម្បីជួយដល់រោងម៉ាស៊ីនបង្កើនការប្រមូលទិញស្រូវពីប្រជាកសិករ ។

នៅក្នុងសំណេនោះគេឃើញមានខ្លឹមសារបន្តថា ក្រោមកម្មវិធីហិរញ្ញប្បទានពិសេសរបស់រាជរដ្ឋាភិបាលសម្រាប់ ជួយដល់ការប្រមូលទិញស្រូវ ក្នុងរដូវច្រូតកាត់ចុងឆ្នាំ២០២៥ និងដើមឆ្នាំ២០២៦ ដើម្បីដោះស្រាយបញ្ហាធ្លាក់តម្លៃ ស្រូវ ARDB បានគូសបញ្ជាក់ថា ក្នុងរដូវកាលប្រមូលផលស្រូវជាបន្តបន្ទាប់មកនេះ តម្លៃស្រូវមានការធ្លាក់ចុះ ខណៈពេលដែលតម្លៃអង្ករលើទីផ្សារអន្តរជាតិកំពុងមាននិន្នាការធ្លាក់ចុះ ដោយសារតែស្តុកអង្ករសម្រាប់សុវត្ថិភាព ស្បៀងឆ្នាំ២០២៤ របស់ប្រទេសមួយចំនួន នៅបន្តប្រើប្រាស់ក្នុងឆ្នាំ២០២៥ ដែលធ្វើឱ្យតម្រូវការអង្ករនៅទីផ្សារ អន្តរជាតិធ្លាក់ចុះ ជាមួយនឹងផលិតកម្មស្រូវនៅកម្ពុជា និងលើសកលលោកបន្តកើនឡើង ។

ARDB បន្ថែមថា« ឆ្លើយតបនឹងបញ្ហាធ្លាក់ថ្លៃនេះ រាជរដ្ឋាភិបាលកម្ពុជា បាន និងកំពុងយកចិត្តទុកដាក់ខ្ពស់លើការ រក្សាលំនឹងថ្លៃស្រូវ និងលំនឹងជីវភាពបងប្អូនប្រជាកសិករ ដោយចាត់វិធានការអន្តរាគមន៍ជាបន្តបន្ទាប់ រួមទាំង ការបញ្ចេញមូលនិធិ ក្រោមកម្មវិធីហិរញ្ញប្បទានពិសេសរបស់រាជរដ្ឋាភិបាល សម្រាប់ផ្តល់ឥណទាន ជាទុន បង្វិលដល់រោងម៉ាស៊ីនកិនស្រូវ ដែលជាដៃគូជាមួយនឹងធនាគារ ARDB និងក្រសួងកសិកម្ម រុក្ខាប្រមាញ់ និងនេសាទ ដើម្បីប្រមូលទិញស្រូវតាមតម្លៃសមរម្យពីបងប្អូនប្រជាកសិករ» ។

ដើម្បីអន្តរាគមន៍រក្សាលំនឹងថ្លៃស្រូវក្នុងប្រមូលផលក្នុងខែវិច្ឆិកាដល់ខែធ្នូ ឆ្នាំ២០២៥ និងដើមឆ្នាំ ២០២៦ ខាងមុខនេះ រាជរដ្ឋាភិបាលបានសម្រេចបញ្ចេញមូលនិធិចំនួន៤០ លានដុល្លារអាម៉េរិកបន្ថែមទៀត ក្រោមកម្មវិធីហិរញ្ញប្បទាន របស់រាជរដ្ឋាភិបាល ដើម្បីលើកស្ទួយផលិតផលកសិកម្ម រកទីផ្សារ និងរក្សាលំនឹង ថ្លៃកសិផល តាមរយៈធនាគារ ARDB សម្រាប់ផ្តល់ឥណទានជាបង្វិលដល់រោងម៉ាស៊ីនកិនស្រូវដៃគូ ប្រមូលទិញស្រូវឱ្យអស់លទ្ធភាព និងតាមតម្លៃ សមរម្យពីបងប្អូនប្រជាកសិករ ។

សូមបញ្ជាក់ថា នេះគឺជាការយកចិត្តទុកដាក់យ៉ាងខ្លាំងរបស់រាជរដ្ឋាភិបាលកម្ពុជា សម្រាប់ផលលំបាករបស់បងប្អូន ប្រជាពលរដ្ឋកសិករ បើទោះជាស្ថិតនៅក្នុងកាលៈទេសៈណាក្តី រាជរដ្ឋាភិបាលកម្ពុជា គឺនៅជាមួយបងប្អូនប្រជា កសិករគ្រប់ពេលវេលា ៕